စစ်ကိုင်း- အောက်တိုဘာ – ၄ – ၂၀၂၅
VOM
ယာယီသမ္မတ ဗိုလ်ချုပ်မှူးကြီး မင်းအောင်လှိုင်ရဲ့ မန္တလေးခရီးစဥ်အတွင်း မန္တလေးနန်းတွင်း အလယ်ပိုင်းတိုင်းစစ်ဌာနချုပ်ရှိရာနေရာကို ချိန်ရွယ်ပစ်တဲ့ ရှော့တိုက်ဗုံး တလုံးကျခဲ့ပါတယ်။
နန်းတွင်း ရှော့တိုက်ဒုံးကျတာနဲ့ ပတ်သက်လို့ မန္တလေးက လုံခြုံရေးအဖွဲ့နဲ့ နီးစပ်သူကို မေးကြည့်တော့ ” ဖြစ်စဥ်သတင်းရပါတယ် မနက် ၆ နာရီကျော်က နန်းတွင်း တပ်ထိန်းတပ်ရှေ့ လမ်းပေါ်ကျတယ် လူ အဆောက်အဦ ထိခိုက်မှုမရှိပါဘူး” လို့ ပြောပါတယ်။
ဒီလုပ်ရပ်ကို Brave Warriors for Myanmar (BWM) အဖွဲ့နဲ့ အခြားလက်နက်ကိုင် သုံးဖွဲ့တို့ ပူးပေါင်းပြီး လုပ်ဆောင်တာဖြစ်တယ်လို့ BWM အဖွဲ့က သတင်းမီဒီယာတချို့ကို ပြောကြားထားတာ တွေရပါတယ်။
ဒီလိုဖြစ်စဥ်တွေရှိပေမယ့်လည်း ဗိုလ်ချုပ်မှူးကြီးမင်းအောင်လှိုင်နဲ့အတူ ပြည်ထောင်စုအစိုးရအဖွဲ့ဝင်တွေဟာ ဒီနေ့မနက် ၉နာရီက မန္တလေးတက္ကသိုလ် ရာပြည့်သဘင်အခမ်းအနားကို တက်ရောက် ဖွင့်လှစ်ခဲ့ပါတယ်။
ရှော့တိုက်ဒုံးကျပြီးတဲ့နောက် စစ်ကိုင်းမြို့နယ် မင်းကွန်းအနီး လက်ပံရွာနဲ့ ကျွန်းပင်ရွာ ဝန်းကျင်တဝိုက်ကို တပ်မတော်က ဒီကနေ့မနက်ပိုင်းမှာ စစ်ကြောင်းထိုးနေတယ်လို့ ဒေသခံတွေကပြောပါတယ်။
” လက်ပံရွာ ဘက််မှာ ဒီနေ့မနက်က တိုက်ပွဲဖြစ်တ၊ စစ်တပ်က လေကြောင်းရော မြေပြင်စစ်ကြောင်းရော ထိုးနေတယ် ကျနော်တို့ကတော့ကြိုရှောင်နေတာ ရွာမှာမနေဘူး ” လို့ ဒေသခံ ရွာသားတဦးကပြောပါတယ်။
၂၀၂၄ စက်တင်ဘာ ၃ ရက် မနက်အစောပိုင်းကလည်း မန္တလေးမြို့က အလယ်ပိုင်းတိုင်းစစ်ဌာနချုပ် (လပခ) ကို ချိန်ရွယ်ပစ်တဲ့ ရှော့တိုက်ဒုံးတွေဟာ လူနေရပ်ကွက်ထဲက နေရာသုံးခုပေါ်ကို ကျရောက်ပေါက်ကွဲခဲ့တဲ့အကြောင်း VOM က သတင်းတင်ဆက်ပြီးဖြစ်ပါတယ်။
ပုံစာ – မန္တလေး ၁၉ လမ်း ၆၆လမ်းဘက်ခြမ်းက နန်းတွင်းဝင်တဲ့ တံတားပုံဟောင်း
